Hövzə Xəbər Agentliyinin verdiyi məlumata görə, tunisli tədqiqatçı Zəhəbiyyə Əl‑Fahim bazar ertəsi günü Ümumdünya İslam Məzhəblərinin Yaxınlaşdırılması Assambleyasının təşəbbüsü ilə keçirilən “Vəhdətin rəhbəri, Qüdsün carçısı və mübarək Ramazan ayının şəhidi Ayətullah Seyid Əli Xamenei” adlı beynəlxalq vebinarda çıxışı zamanı vurğulayıb ki, dövlətlərin böyük güclərin hegemonluğuna boyun əydiyi, Fələstin məsələsinin isə bir çox siyasi diskurslarda boş şüarlara çevrildiyi, ya əhəmiyyətini itirdiyi, ya da uzlaşma üçün alətə çevrildiyi bir dövrdə Ayətullah Seyid Əli Xamenei qətiyyət və möhkəm iradə ilə iki fərqli mövqenin qarşısında dayanmışdır. Bu mövqelərdən biri Fələstin məsələsini siyasi maneə kimi qiymətləndirən yanaşma, digəri isə fələstinlilərin hüquqlarına sadiqliyi və onlara dəstək göstərilməsini şərəf meyarı, iman və düşüncə tərəzisinin ölçüsü hesab edən yanaşmadır.
Tunisli tədqiqatçı qeyd edib ki, onun güclü və təsirli diskursu daim qətiyyətlə Fələstin xalqının azadlıq və müstəqillik əldə etmək, yaşamaq hüququ və müqavimət seçimi kimi ayrılmaz hüquqlarını müdafiə etmiş, bu mövqe isə heç vaxt təhdidlərin və sanksiyaların təsiri altına düşməmişdir.
O əlavə edib ki, Fələstin məsələsinə dəstək onun üçün heç vaxt yalnız şüar səviyyəsində qalmayıb. Əksinə, bu məsələ dövlət siyasətində rəsmi seçim kimi qəbul olunmuş, maddi, mənəvi və informasiya dəstəyi ilə real şəkildə təzahür etmişdir. O inanırdı ki, müqavimət Fələstin xalqının tam haqqıdır və güc balansındakı fərq mübarizədən imtina üçün əsas sayıla bilməz.
Zəhəbiyyə Əl‑Fahim bildirib ki, bəzi rejimlər Fələstin məsələsi qarşısındakı susqunluqlarını siyasi reallıqlarla əsaslandırmağa çalışdıqları halda, Ayətullah Xamenei siyasi reallığa fərqli məzmun verərək onu düşmənin tanınması, hüquqların, torpağın və müqəddəs dəyərlərin müdafiəsi kimi izah edirdi. Çünki öz hüquqlarından geri çəkilmək sülh yaratmır, əksinə, təslimiyyət və məğlubiyyətin əsasını qoyur.
Əl‑Fahim qeyd edib ki, Ayətullah Seyid Əli Xameneinin diskursu bütöv və geniş baxışa əsaslanırdı və o hesab edirdi ki, torpağın azad edilməsi ilk növbədə iradənin azad edilməsindən başlanır. Fələstinə dəstək isə bir ölkənin digər xalqa göstərdiyi lütf deyil, əksinə, mənəvi və siyasi məsuliyyətdir.
O vurğulayıb ki, Ayətullah Xamenei işğala qarşı müqaviməti hər zaman hegemonluğa qarşı mübarizə ilə əlaqələndirirdi. ABŞ-da müxtəlif administrasiyaların dəyişməsinə baxmayaraq, onun mövqeyi heç vaxt dəyişməmiş və o daim bəyan etmişdir ki, Fələstin məsələsi qlobal ictimaiyyətin mənəvi dəyərləri üçün ən böyük sınaqlardan biridir.
Rəyiniz